MFAHAMU SHEM IBRAHIM KARENGA MTUNZI WA MUIMBAJI NA MPIGA GITAA

Shem Karenga

Hakuna mpenzi ama shabiki wa miondoko ya muziki, hususan wa dansi hapa nchini, asiyelifahamu jina la mwanamuziki mkongwe, Shem Ibrahim Karenga. Shem Karenga ametokea kuwa maarufu mno hapa nchini pamoja na mataifa kadhaa jirani, kutokana na umahiri wake wa miaka mingi wa kuimba na kucharaza gitaa kiongozi la Solo.
Wengine wengi wanamfahamu kupitia tungo zake mbalimbali zilizochangia kumpa umarufu, alizozifyatua akiwa na bendi hizi na zile, kama vile ‘Tucheze Segere’, ‘Muna’, ‘Kila jambo’ na ‘Mbelaombe’. Kutokana na kutambua mchango wake katika tasnia ya muziki wa dansi, blog hii leo imefunga safari hadi nyumbani kwake Buguruni kwa Madenge, jijini Dar es Salam na kufanya naye mazungumzo juu ya maisha yake ya kimuziki.

Shem Ibrahim Karenga, mkongwe wa muziki wa dansi Alizaliwa mwaka 1950, Bangwe, Kigoma na kupata elimu ya msingi katika shule ya kimishionari ya Kihezya kuanzia mwaka 1957 hadi mwaka 1964.

“Kiukweli, nilianza kujifunza muziki tangu nikiwa shuleni kwa sababu mimi nimesoma shule ya Wamishionari, sasa kule tulikuwa tukifundishwa fani hiyo,” ndivyo anavyoanza kusema Karenga.

Karenga anasema kuwa, baada ya kumaliza shule huku shetani muziki akiwa kampanda kichwani, mwaka 1964 alijiunga na bendi ya Lake Tanganyika Jazz ambayo maskani yake yalikuwa mjini Kigoma. Anakumbuka kuwa, aliingia Lake Tanganyika akiwa mwimbaji na mcharazaji wa gitaa la besi, ambako pia alikuwa na ujuzi wa kutengeneza gitaa kwa kutumia vifaa vya kuokoteza. Akiwa na Lake Tanganyika Jazz, aliyodumu nayo kwa miaka minane, alianza pia kujifunza vyombo vingine vya muziki kama vile; Drums, Kinanda, gitaa la Rithym na  la Solo’. 

Kutoka kushoto waliosimama Capy John Simon, Shem Karenga, Muhidin Gurumo, Juma Kilaza, Ally Rashid, Kassim Mapili na Salum Zahoro. Waliochuchumaa Nguza Viking, Mjengo,...

“Mwaka 1972, niliitwa kwenye bendi ya Tabora Jazz kama mwanamuziki mwenye kipaji cha utunzi, mwimbaji na mpigaji  wa gitaa la Solo, nilijiunga na Tabora Jazz nikiwa na vibao vyangu Dada Asha na Lemmy nilivyovitungia Lake Tanganyika, ambavyo vilinipa umaarufu mkubwa nilipo vipakua hapo Tabora Jazz'.
Anasema, Tabora jazz walimchukua akiwa Mtaalam wa muziki, ambako hata hivyo alipokuwa na bendi hiyo alikuwa akijiendeleza zaidi kwa masomo ya jioni kwenye shule ya Sekondari ya Milambo, Tabora pamoja na kusoma vitabu mbalimbali vya muziki.

Shem Karenga enzi za ujana

Katika Tabora Jazz ambako alikuwa pia kama Kiongozi wa bendi, Karenga alikutana na wakali wengine wa muziki kama vile Kassim Kaluona na
Athuman Tembo ambao kwa sasa ni marehemu pamoja na Salum Muzila.

Kutokana na sababu binafsi ambazo hakutaka kuziweka wazi, mwaka 1983 alijiengua kutoka Tabora Jazz na kusimama kabisa kujihusisha na muziki, ambako kilichofuatia ilikuwa ni kifo cha bendi hiyo.

“Mwaka 1990 niliondoka Tabora na kutua jijini Dar es Salaam nilikokutana na Baraka Msirwa katika mwaka huohuo na kuniomba nijiunge na MK Beats ili kuiongezea nguvu,” anasema Kalenga.

Ndani ya MK Beats iliyokuwa ndugu na bendi nyingine iliyotamba vilivyo enzi hizo, MK Group, Karenga alikutana na wakali kama Malik Star,
Sisko Lulanga, Fungo Shomari na Bwami Fanfan.

Baada ya kujiunga na MK Beats iliyokuwa ikitumia mtindo wa ‘Tukunyema’, Karenga aliisuka vema na kuinyanyua vilivyo hasa kwa vibao moto wa kuotea mbali vilivyozitetemesha vikali bendi nyingine
zote za wakati huo.

Mwaka 1995, MK Beats ilisambaratika, ambako mwaka uliofuata, yaani 1996 alianzisha bendi ya Tabora Jazz Star kwa kushirikiana na mtu
aliyemtaja kwa jina la Ibrahim Didi.

“Bendi ya Tabora Jazz Star ndio niliyo nayo hadi sasa nikiwa Mkurugenzi Msaidizi, ambako nafasi ya Mkurugenzi Mkuu imeshikiliwa na Didi mwenyewe,” anasema Kalenga.

Akizungumzia anavyouona ushindani wa kimuziki akiwa na bendi yake hiyo ya Tabora Jazz Star, Karenga anasema kwa upande wake mambo si mazito sana kwa kuwa ana mashabiki wake wa tangu huko nyuma.

Kwa upande wa mafanikio, Karenga anasema ukiondoa nyumba nzuri aliyoiporomosha nyumbani kwao Kigoma, anashukuru kuona ana marafiki wengi na anaishi atakavyo akiwa anamudu vema kuitunza familia yake.

Ushauri anaoutoa kwa wanamuziki na mashabiki wa dansi ni kuwa, wasibabaike kwani muziki huo ni wa kudumu, ambako hata hivyo anasikitika kuona kuna uhaba mkubwa wa vijana warithi wa miondoko hiyo
kwa sasa.

“Unajua, sisi tulirithi dansi kutoka kwa baba, kaka na wakubwa zetu wengine, lakini ni masikitiko makubwa kuona vijana wetu wa sasa wanarithi muziki hewa wa Bongo Fleva,” anasema.

Anasema, sababu ya kuuita muziki wa Bongo Fleva kuwa hewa ni namna wasanii wake wanavyopora midundo na ala kutoka nje huku wakijidai kuwa ni mtindo mpya wa muziki hapa nchini.

Mkongwe huyo anayebainisha siri yake ya kukubalika katika muziki kuwa ni bidii na juhudi za dhati kwenye fani hiyo, anasema anavutiwa na wasanii wote wanaofanya vema katika sanaa.

Kama ilivyo kwa wakongwe wengine wengi wa muziki, Karenga amefaulu kuwarithisha muziki watoto wake wawili wa kiume ambao ni Ramadhan na Mussa waliowahi kuwika vilivyo katika bendi ya TOT Plus.

“Mussa ni mwimbaji na rapa mahiri, ambako kaka yake, Ramadhan ni mcharazaji wa gitaa kiongozi, Solo,” anasema Kalenga, baba wa watoto sita.

Watoto wengine wa Kalenga ambao hawakubahatika kurithi kazi yake ya muziki ni Tausi, Biata pamoja na Rehana.

ABBA KUNDI LA MUZIKI TOKA SWEDEN, LILILOWAHI KUTINGISHA DUNIA

Kundi la ABBA lilianza mwaka 1972, na lilikuwa ni la vijana wanne wa Kiswidi Agnetha Fältskog, Björn Ulvaeus, Benny Andersson, and Anni-Frid Lyngstad. Na kutokana na herufi za kwanza za majina yao ndio wakapata jina la kundi lao ABBA. Katika historia ya muziki wanasemekana ndilo kundi lililofanikiwa sana kibiashara kwa kuwa katika top ten ya mauzo katika nchi mbalimbali duniani kwa kipindi cha miaka 7 kati ya 1975 mpaka. Mwaka 1974 kundi hili ndipo lilipojitokeza kwa kushinda yale mashindano ya muziki wa nchi za Ulaya ya Eurovision Song Contest. Na hiyo ilikuwa ni mara ya kwanza katika historia ya shindano hilo kwa kundi toka Sweden kushinda,  na pia kwa mara ya kwanza Sweden kuwa na kundi ambalo lilikuja julikana dunia nzima. Kundi la ABBA liliuza zaidi ya album na singles milioni 380. Agnetha na Bjorn  walioana na pia Anni-Frid na Benny walikuwa ndani ya ndoa japo ndoa zote zilikuja vunjika.  Ndoa zao kufikia 1981 zilikuwa zimekwisha vunjika, tatizo kubwa ni kutokana na mzigo wa umaarufu.

Mwaka 1982 kundi lilivunjika japo haijawahi kutangazwa rasmi kuwa kundi lilivunjwa. Wanaume katika kundi hili waliendelea kuwa pamoja wakitunga nyimbo kwa ajili ya michezo ya jukwaani(musicals), wakati akina mama kila mmoja akaanza shughuli kivyake (solo), na umaarufu wa kundi ukaanza kushuka. Filamu ya Mama Mia iliyotoka 1999 ikiwa na nyimbo nyingi za ABBA ilitengenezwa baada ya mchezo wa kuigiza (musical), wenye jina hilo kupata umaarufu sana. Filamu hiyo ndiyo iliyoingiza pesa nyingi zaidi ya filamu nyingine nchini Uingereza kwa mwaka huo. Wimbo wa ABBA, Waterloo,  ambao ndio ulioweza kuwafanya washindi wa Eurovisiona Song Contest ulichaguliwa kuwa ndio wimbo bora uliowahi kutokea katika shindano hili.

KAMA KAWA EFM 93.7FM INAKULETEA MUZIKI ULITINGISHA ZAMA ZILE, LEO HEWANI TENA USIKOSEE

JUMAPILI NYINGINE NDIO NIMEMALIZA KUKUKUSANYIA NYIMBO NTAKAZOKUPIGIA LEO...LA BAMBA UNAJUA ILITOKA WAPI? DOUBLE OO, NA NYIMBO SITA AMBAZO N SURPRISE, SIKIA SAUTI YA MOSHI WILLIAM TX ALIPOKUWA MDOGO, MSIKILIZE TENA SKEETER DAVIS EFM 93.7FM KUANZIA SAA 2-5 USIKU LEO KWA WENYE INTERNET ANUANI NI HII http://tunein.com/radio/E-FM-Radio-937-s224740/

IJUE BEMBEYA JAZZ YA GUINEA

Bembeya Jazz, hutajwa kama ni nguzo ya historia ya muziki wa kisasa wa Afrika Magharibi. Bendi hii ilianza vipi?

Mwaka 1958 kulikuweko na kura ya maoni katika nchi zilizotawaliwa na Wafaransa Afrika Magharibi ambapo wananchi waliulizwa kama wanataka kuendelea kuwa chini ya Ufaransa, Guinea ndio nchi pekee iliyokataa. Sekou Toure akachaguliwa Rais  wa nchi hiyo, na kati ya vitu alivyoanzisha mara  moja ilikuwa ni Bendi ya Taifa iliyoitwa Syli National Orchestra. Bendi hii iliyokuwa na maskani katika jiji la Conakry iliendelea kukuwa na kuwa kubwa hatimae  mwaka 1961 ikagawanyika katika makundi mawili Bala et ses Balladins na Keletigui et ses Tambourinis. Kutokana na  upenzi wake wa sanaa Sekou Toure alitengeneza bendi za mikoani, ambazo alizifadhili kwa vyombo na fedha. Katika jiji la Beyla kusini mashariki mwa Guinea kwenye mwaka 1961 Gavana wa mkoa huo Emile Conde alianzisha kakundi kake kadogo kakiwa na gitaa moja tu kavu na bila uzoefu mwingi lakini taratibu kakanza kujitokeza. Kabendi haka toka mikoani kalishinda mashindano mengi na kakajulikana sana Conakry, hatimae chama tawala kiliitaka Bembeya ihamie Conakry mwaka 1965, na kakataifishwa na kufanywa bendi ya Taifa kama zile nyingine mbili. Bendi hii ilianza kwa kuitwa Beyla Jazz, lakini siku moja April 1961, katika mkutano wa bendi wakaamua kujiita Mbembeya Jazz

 Wakati huo Guinea kulikuwa na aina mbili za wanamuziki wale waliopiga muziki kutumia muziki wao wa  asili na wale waliotoka kwenye mashule ya Kifaranza amabo walipiga muziki wa asili ya Cuba, kuna amri iliyotolewa na serikali kueleza wanamuziki wapige muziki kutokana na vionjo vya kwao kwenye katikati ya miaka ya 60. Hivyo ukisikia nyimbo za Bembeya Jazz kabla ya hapo unasikia vionjo vya Cuba kama vile Whisky Soda na Mamiwata  ni mfano wa upigaji huo, baada ya hapo na mpaka ilipokuja kurekodi mara ya mwisho bendi hiyo imekuwa na vionjo vya muziki wa asili wa  Guinea

Wakati wa uhai wa Sekou Toure, nchi hiyo ilianzisha record label iliyoitwa Syliphone, ilikuwa label ya Taifa, jambo hilo halikuwahi kufanyika popote Afrika, Tanzania ilijaribu kuiga mfumo huu na iliweza kutoa kazi chache kwa kutumia Tanzania Film Company na  kuwa na label kama TFC na Sindimba.

 Bahati mbaya hali ya uchumi wa Guinea ulipoharibika miaka ya 70 label hiyo ambayo iliyoweza kutoa album 80 ilikufa, na ndipo wanamuziki wa nchi hiyo wakaanza kuelekea Ufaransa. Sekou Toure alifanya kazi kubwa kwa nchi yake kwa upande wa sanaa na kuweza kuifanya Guinea kuwa kati ya nchi zilizoongoza Afrika katika utamaduni wa muziki. Bahati mbaya taratibu alianza udikteta na watu waliompinga wakaanza kupotea au kuuwawa, kama ilivyotokea kwa Fodeba Keita msanii aliyeanzisha kundi la kwanza la Ballet nchini Guinea na Sekou Toure akamfanya Waziri wa Mambo ya Ndani, lakini kufikia mwishoni mwa miaka ya 60, Sekou Toure akawa na wasiwasi kuwa Fodeba atampindua, basi alimfunga na hatimae mtu huyu akapotea, haijulikani alikufa vipi au lini. Pamoja na udikteta huo alikuwa tofauti na Mobutu. Alikuwa mzalendo hakuwa fisadi wa kuiba mabilioni na kuyatorosha nje kama Mobutu, bali aligeuka kuwa katili wa kulinda utawala wake. Pamoja na maelfu ya Waguinea kuikimbia nchi yao kutokana na utawala huu wanamuziki wachache walimlaani kwani wengi walifaidika na fadhila zake katika tasnia ya muziki.

Kufikia mwaka 1980 Bembeya Jazz  ilikuwa haipigi tena maonyesho ya kawaida  labda kwa kukodishwa. Kati ya mambo makubwa ya kusikitisha yaliyokikumba kikundi hiki ni kifo cha muimbaji wao Demba Camara ambaye alifariki gari lao lililokuwa likiendeshwa na dereva wa bendi kupinduka wakiwa safarini, katika gari hilo pia alikuweko Sekou 'Bembeya' Diabate (Diamond Finger). Demba alikutwa ametupwa nje ya gari walipowasili wanamuziki wengine waliokuwa katika gari jingine.

Sekou 'Bembeya' Diabate

Sekou 'Bembeya' Diabate bado anafanya maonyesho lakini hasa nje ya Guinea

Kwa wale wanaojua historia ya sanaa ya Tanzania watajua kuwa Tanzania iliiga baadhi ya taratibu za sanaa za Rais Sekou Toure wa Guinee, kuanzishwa kwa kundi la sanaa la Taifa na hata kuanzishwa kwa bendi ya wanawake,  yalitokana na ziara za Rais huyo hapa kwetu ambapo alikuja kasindikizana na kundi kubwa la wasanii wa kundi la Taifa.

JE UNA MASWALI KUHUSU MUZIKI AU MWANAMUZIKI WA ZAMANI?

UNGEPENDA KUSIKIA AU WIMBO MAALUMU WA ZAMANI, AU KUJUA HABARI ZA MWANAMUZIKI WA ZAMANI TUMA SMS KUPITIA +255 763 722557, NA JIBU UTALIPATA KUPITIA EFM RADIO 93.7FM KILA JUMAPILI KUANZIA SAA 2-5 USIKU NA PIA KUPITIA KURASA ZA BLOG HII

KATIKA KIPINDI CHA ZAMA ZILEE 93.7FM LEO

BEMBEYA JAZZ TOKA GUINEA

Baadhi ya makundi na wanamuziki utakao wasikia leo John Mwenda Bosco,Bembeya Jazz,Black Blood, Elvis Presley, James Brown, Maroon Comandoes, Tancut Almasi Orchestra, Orchestra Mambo Bado, Kiko Kids, Jamhuri Jazz, Tabora Jazz, Bima Lee, Sola TV, Nuta, Double O, Sunburst, Orchestra Sosoliso, Orch Negro Success,TP OK Jazz na wengi wengine usikose kuanzia saa mbili mpaka saa tano usiku.....http://tunein.com/radio/E-FM-Radio-937-s224740/

KIJIWE CHA KITIME SASA PIA KATIKA 93.7 FM REDIONI KILA JUMAPILI

Kila Jumapili kuanzia saa 2 hadi saa 5 usiku kupitia EFM 93.7 Fm, ntakuwa nikikuletelea muziki wa zamani kutoka ulimwenguni kote. Kipindi hiki kitakuwa kikirushwa kupitia radio mpya EFM. Katika kipindi hiki licha ya muziki pia kutakuwa na hadithi mbalimbali kuhusiana na muziki na maisha yalivyokuwa wakati huo. Unaweza kuwasiliana nami kupitia ukurasa wa Facebook huu https://www.facebook.com/pages/ZAMA-Zileeeee/288646357969709 ingia hapa u Like ukurasa huu na kutoa mapendekezo ya unachokitaka. Pia unaweza kuipata redio hii katika mtandao wa internet kupitia http://tunein.com/radio/E-FM-Radio-937-s224740/ haya ingia hapa ufaidi muziki, vichekesho masaa 24.